काठमाडौं । क्रिकेटर सन्दीप लामिछानेविरुद्ध मुद्दामा आज सुनुवाइ हुने भएको छ। मुद्दाको पेशी न्यायाधीश शकुन्तला कार्कीको इजलासमा तोकिएको छ।

यसअघि भदौ १० गते सुनुवाइका लागि मुद्दाको पेशी तोकिएपनि ‘हेर्न नभ्याइने’ सूचीमा राखेको थियो। त्यसपछि जिल्ला अदालत काठमाडौंले आजका लागि पेशी तोकेको थियो।

लामिछाने एसिया कप खेलेर बुधबार स्वदेश फर्किएका छन्।

साउन ३२ गते जिल्ला अदालत काठमाडौंले लामिछानेको मुद्दामा पीडितको आमाको जन्ममितिसम्बन्धी कागजात मगाउन आदेश दिएको थियो। न्यायाधीश राजुकुमार खतिवडाले पीडितकी आमाको जन्ममिति दुईथरी देखिएकाले यकिन गर्न आदेश दिएको थियो।

लामिछानेमाथि काठमाडौंको गौशालास्थित एक होटलमा नाबालिका बलात्कार गरेको आरोप छ।

यसअघि मुद्दाको थुनछेक बहसका क्रममा जिल्ला अदालत काठमाडौंले लामिछानेलाई पुर्पक्षका लागि कारागार पठाउने निर्णय गरेको थियो। बाहिरबाट मुद्दा लड्न पाउने माग गर्दै लामिछाने जिल्ला अदालतको सो फैसलाविरुद्ध उच्च अदालत पाटनमा रिट दायर गरेका थिए।

पछि उच्च अदालत पाटनले २० लाख धरौटीमा छाड्न आदेश दिएको थियो। धरौटीमा रिहा भएपछि लामिछाने फेरि सर्वोच्च अदालत गएका थिए। धरौटी रकम धेरै लिएको र विदेश जान रोकेकाले त्यसको विरुद्धमा सर्वोच्च पुगेका थिए।

पछि सर्वोच्च अदालतले लामिछानेलाई क्रिकेट खेल्न विदेश जान अनुमति दिएको थियो। त्यसपछि उनलाई अन्तर्राष्ट्रिय रुपमा क्रिकेट खेल्नका लागि विदेश जान सहज भएको थियो।

सर्वोच्च अदालतले संवेदशील विषयको मुद्दा भएको भन्दै अग्राधिकारसहित चाँडो फैसला गर्न आदेश दिइसकेको छ। तर, जिल्ला अदालतमा भने मुद्दाको सुनुवाइ हुन सकेको छैन।

पीडित किशोरीले आफन्तको सहयोगमा गत भदौ २१ गते गौशाला प्रहरी कार्यालयमा उजुरी दिएकी थिइन्। प्रहरीले लामिछानेलाई २० असोजमा त्रिभुवन अन्तर्राष्ट्रिय विमानस्थलबाट पक्राउ गरी हिरासतमा लिएको थियो।