काठमाडौं । शुक्रबारदेखि चुनावी तयारी कार्यक्रम शुरू गर्ने नेपाली कांग्रेसको पूर्वनिर्धारित कार्यक्रम स्थगित गरेर पार्टी सभापति एवम् प्रधानमन्त्री शेरबहादुर देउवाले बिहीबार सत्ता गठबन्धनको बैठक राखे । बालुवाटारमा बसेको गठबन्धनको बैठक चुनावी एजेण्डामा केन्द्रित भयो ।
‘जुन कारणले हामीले गठबन्धन बनाएका थियौं । राजनीतिक स्थायित्वका लागि गठबन्धन आवश्यक छ’ सरकारका प्रवक्तासमेत रहेका कांग्रेस केन्द्रीय सदस्य ज्ञानेन्द्रबहादुर कार्कीले भने, ‘गठबन्धन अघि बढ्छ । चुनावी गठबन्धनका लागि आ-आफ्नो दलमा सजिलो र अप्ठ्यारा विषयमा छलफल गरेर एउटा निष्कर्षमा पुग्छौं ।’ अर्थात् प्रधानमन्त्री देउवाले गठबन्धन अब चुनाव केन्द्रित एजेण्डामा प्रवेश गरेको प्रष्ट सन्देश दिएका छन् ।
सत्ता साझेदार अन्य दलका नेताहरुले निकै पहिलेबाटै आगामी चुनावसम्म गठबन्धन रहने सार्वजनिक अभिव्यक्ति दिंदै आएका थिए । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालले त हरेकजसो सार्वजनिक मन्तव्यमा तीन तहकै चुनावसम्म गठबन्धन रहने बताउने गरेका छन् । त्यही गठबन्धन नेतृत्वको प्रधानमन्त्री देउवाले भने यो विषयमा प्रष्ट बोलेका छैनन् । त्यही मौनताकै कारण गठबन्धन टुट्न सक्ने आशंका समेत गरियो ।
८ फागुनमा एमसीसी प्रतिनिधिसभामा पेश भएपछि त गठबन्धन भत्कने खतरा बढेको सत्तारुढ नेताहरूले नै सार्वजनिक अभिव्यक्ति दिए । माओवादी केन्द्र र एकीकृत समाजवादीले एमसीसीको विपक्षमा मतदान गर्ने संस्थागत निर्णय गरेपछि गठबन्धन तोडिने प्रष्ट आधार समेत देखियो । जसरी पनि एमसीसी अनुमोदन गराउने अडानमा रहेका प्रधानमन्त्री देउवाले विपक्षी दल नेकपा एमालेसँगको सम्वाद ६ फागुनपछि तीव्र बनाएकाले पनि गठबन्धन धर्मराउन पुगेको थियो ।
